جبر الخواطر

متابعه/حسن الرفاعي

بكام ياحاجه شروة السمك دي على بعضها!!
كلهم يابني!!
أيوه ياحاجه كلهم كلهم…
كلهم يابني على بعضهم كدا مممممم ب٢٥٠ جنيه عشان عايزه أروح..وخلي عنك خالص والله.

٢٥٠ ايه ياحاجه انتي مش عايشه معانا…محدش بقى لاقي الجنيه…خليكي حنينه كدا ..

والله يابني انا من صباحية ربنا وانا قاعدة بيهم كدا في الشمس وعاوزه اروح لعيالي…خدهم ب ٢٢٠ جنيه.

ياحاجه انتي فكراني أفندي!…دول اخرهم ١٥٠ جنيه …وابقى مكارمك كمان…عشان تروحي من الشمس.

يابني انا والله شارياهم من الصيادين ب ال١٥٠ جنيه وبسترزق منهم.. هات ٢٠٠ جنيه والله يباركلك في عيالك.

بقولك ايه هما ١٥٠ جنيه ..هتاخديهم ولا أمشي!!
وهترجعي بيهم اصلا …خلاص الوقت راح والدنيا هتضلم عليكي…ها!!

خلاص يابني هات ال ١٥٠ جنيه ويعوض ربنا عليا..

اخذهم البطل المغوار ب ١٥٠ جنيه ورجع رافع راية النصر ودخل بيته ،،، وقابلته أم العيال وخدت منه السمك وقالتله ماشاء الله ايه دا كله!

قالها تصدقي ان كل دول ب ١٥٠ جنيه!! قالتله لا ماتهزرش !! قالها والله زي مابقولك …
قالتله ازاي دا الكيلو بس في الهايبر بخمسين ودول مايقلوش عن سته سبعه كيلو!!!
قالها عيب عليكي انتي مش متجوزه اي حد…. انا محدش يضحك عليا!!!

🔴 ولنا هنا وقفة…في حاجه اسمها جبر الخواطر
الست دي من صباح ربنا لاخر اليوم
عاوزه تجيب عشره عشرين جنيه
لولادها وربنا اعلم ممكن تكون
بتربي ايتام ومش عاوزه
تمد ايدها للناس وهي افضل من الف شحات بيلف يطلب من ده وده اي جنيه….
في النهايه
رحم الله رجل سمحا اذا باع واذا اشتري…
اعتبر نفسك بتتصدق عليها وبتساعدها لوجه الله….
——————————————-
جبر الخواطر لا يعلم أجره إلا الله..
وكل الموضوع مش مكمل حق كام علبة سجاير
ممكن تهادي بيها صحابك في قعده واحده
———————————.
للاسف اننا بنتشطر علي الغلابه بس
لو دخلنا فندق او مطعم بنتنافس في دفع البقشيش وعند الغلابه بنتنافس في اننا نضحك عليهم ونفاصل معاهم
—————————————————————-
اللهم اجعلنا ممن يجبرون بخواطر الضعفاء فتجبرنا يوم نقف بين يديك يا رب العالمين 🤲🤲🤲🤲🤲🤲

#جريده مصر الدوليه

اترك رد

لن يتم نشر عنوان بريدك الإلكتروني.